去到第三日，其中一個朋友一早就要返香港了......
第一日買嘅咖啡，好難飲
似朱古力飲品多D...
之前講過諗住去睇田中達也嗰個微型展，去到覺得肚餓，所以先搵吓附近有咩食先。
食麵嘅舖頭有好多，唯獨呢間牛扒最吸引。仲要係139！！！
布丁牛板烤牛排-西屯店 facebook 應該係呢間呱
廚房喺出面，非常開揚～
飲品同湯免費任飲，我試咗隻金桔檸檬漾，都ok。
太平嗰D唔敢試，叫咗三個，每個都係二百幾。總括嚟講，厚切同唔厚切分別唔大，反而個雞腿最好味
食飽飽就買飛入場啦～個展覽去到9月9號，有興趣可以嚟睇吓。
每個展品都有標題，但係我全部冇記低，所以以下嘅標題都係......我作嘅
原來我打錯字，但懶得改......
好鍾意呢個memory card鋼琴
好易睇漏睇嘅一個展品，真係好想㩒落去
咁就睇完啦～如果慢慢用心睇，都可以睇半日㗎。
其實我哋唔會再入，不過我又想睇吓個印係點樣（同埋俾個機會姐姐仔捉住我隻手）
繼續我哋嘅行程，去家樂福......買手信！
個樽好靚，但係Mojito味嘅氣泡水......好怪呀
行完家樂福就去咗誠品逛吓街
地下有舊咁嘅嘢，不過...我對我嘅未來冇乜期望
比較過其他店嘅鳳梨酥，都係冇乜特別，所以返嚟呢度買。
其實呢間係宮原眼科嘅二店，所以職員嘅制服係一樣嘅（唔同色）
買完嘢放返喺酒店，就去忠孝路夜市行吓，酒店行過去只需大約15分鐘，順便睇吓呢度有冇適合我哋晚餐嘅地方。
嘢食確實係有好多，但係大部份都冇冷氣，裝修又簡陋，所以上網搵吓有冇其他地方。
途中見到呢個眼碌碌嘅崩牙老伯
鎖定目標！食燒烤！之前搵到幾間，但係間間都full booking
呢間嘢喺誠品附近，有兩個價錢可以選擇：599同699（另加一）
都係兩個鐘任飲任食（唔包啤酒）啤酒都只係40台幣一支，抵！
我哋揀咗699，之後諗返其實揀599已經可以。因為只係差幾樣食物，所以在場見其他人多數都係揀599（點菜紙唔同色，所以一睇就知）
食物的確唔錯！特別係霜降牛肉，反而個天使紅蝦比較差，可能食599嗰隻白蝦仲好。不過圖右下嗰兩兜嘢，味道都好奇怪...
仲有甜品同雪糕任食，對香港人嚟講，呢個價錢真係超值～
第三日 完
留言列表
