好耐未試過專登攞一日假做自己想做嘅嘢~
呢個魚排想去好耐,但係以前唔會自己一個上排。一路想約釣友嚟試試,但一直都約唔到...把心一橫決定放自己一日假嚟玩吓~
去呢個排一般都係搭東鐵去到大埔墟站,再轉巴士/小巴。當然搭小巴會快少少,梗係搭小巴啦!
原來今年5月加咗價。
有兩個碼頭可以上船,一個係三門仔村碼頭,另一個係漁安街碼頭。圖中所示係三門仔村碼頭(附近)。排主話去漁安街碼頭近D,不過要諗清楚,如果預先已經買晒嘢,可以喺漁安街上船,但係如果需要買魚餌的話,去三門仔村會好D。
落車後要行落三門仔村碼頭,大約兩分鐘(即係箭咀指示方向)
行到尾就會見到呢間廣興士多,由於我一早買咗魚餌,所以唔需要喺呢度補給。呢個時候可以打俾排主,話俾佢聽已經到咗廣興士多,佢就會揸隻艇出嚟接你。
廣興士多對住就係呢個碼頭,行到最篤就係上船位。
一般情況,三至五分鐘就會嚟到。咁就...向魚排出發!
都係好快,大約五分鐘船程,而我要上個排喺呢個後面。
估唔到星期三日頭都有咁多人,連埋我應該有十個。呢個排唔算大,圖中個位係最開揚㗎啦,所以大部份都係喺呢個位釣。當然你可以喺排邊向外釣,但係其他位冇太陽遮,唔怕曬死就試吓啦~
上排費$120(不包括任何釣具及魚餌)
唔想曬仲有另外一個方法,中間有幾塊木板可以移開,咁就完全曬唔到~
大部份人上魚排都會笩竿(即係笩仔),而我呢支行萬用笩,相對竿頭冇笩仔咁軟,靈敏度會較低,但係呢支竿可以出海釣都用得,所以我無論上排或者艇釣都會用呢支竿。
另外,失手繩係上魚排必備嘅嘢,已經聽過無數次有人稍為冇留意支竿,轉個頭成支竿就飛咗落海!!!雖然機會好微,但係我唔想因為咁而要買過一套囉!
呢個魚排其中一個好處,係可以叫飯食。每個飯盒連飲品$40,每日有五款揀,都算幾平。當然會全部人夾埋一次過叫啦~當日我同另一個釣友明明聽到佢話係滑蛋叉燒飯,點知嚟到變咗咸蛋叉燒飯......
介紹返我當日用嘅魚餌:生蝦同青蟲
由於我本身唔知三門仔附近有冇得賣,一早去觀塘買定,生蝦二両+青蟲二両,盛惠$60
排主同我講,呢個排生蝦唔係咁適合,因為打粉(誘餌粉)嘅人較多,所以D魚唔會食生蝦(結果證明......)
其他釣友嘅魚餌,佢玩搓波仔,即係先將隻南極蝦鈎落隻鈎度,再用誘餌粉包住變成一個波,再將成個波放落海。落到海底,個波就會慢僈散開(或者俾D魚啄開),等D魚食隻南極蝦就上釣啦!
其餘嘅釣友,九成都係用泥鯭膏,只有我一個咁奇怪......
全場都係專釣泥鯭(即係臭肚),所以人人都好忙,我就靜靜咁望住佢哋不停上魚......
以上嘅魚穫係一位釣友嘅戰績,佢話最少都有五十條。另外,其他釣友話呢度D泥鯭好乾淨,所以全部都會拎返屋企煮嚟食。
我又嚟扮吓專家,個人嚟講釣日頭魚,太陽眼鏡非常重要。而我就特別鍾情偏光鏡(Polarized),佢同一般防UV太陽眼鏡有咩分別?
太陽眼鏡除咗隔絕紫外光之外,對釣魚人士嚟講,海面嘅反光都非常利害。當日有個女仔問:「我都冇曬過,點解都會黑咗?」就係因為海面嘅折射,會反返上嚟,所以都一樣會曬黑。偏光鏡嘅好處係可以將折射減低,睇返張相,用咗偏光鏡嘅反光明顯少咗,對眼睇嘢都舒服D。(左邊嗰舊白色嘢係眼鏡脾嘅反影)
隔咗好耐,忽然起鬨!因為搓波仔嗰位釣友中咗條大烏頭,呢條魚應該有三斤重。
而我都唔執輸,起返條BB魚......
咁樣就玩咗一日啦~雖然中唔到魚,但係呢個場確實係舒服嘅。不過其實我鍾意釣夜魚多D,始終夜晚中大魚嘅機會多D,同埋...我真係唔鍾意釣泥鯭。
香港魚排有D可以燒埋野食,或者有D提供海鮮餐,呢類適合一大班人去。而「天與海」就獨沽一味,只有釣魚。
後話:
雖然呢個場嘅釣法唔太適合我,但係我仍然想嚟多一次試吓釣通宵魚。有D經常嚟嘅釣友話呢個場非常乾淨,佢嚟咁多次都未試過見到小強(即係蟑螂/曱甴),呢樣嘢對我嚟講好緊要,因為...我好驚小強......
排上面亦有飲品供應,一罐青島只係$10,我覺得絕對係良心價。
留言列表