每年都有一次可以唔預老婆,同幾個「兄弟」出遊玩幾日。
今年嘅目的地係:台中
我張咭一年只會送兩張機場貴賓室嘅voucher,但係我朋友就可以帶我去另一個lounge,咁就梗係跟佢去見識吓啦
呢個lounge對住停機坪,感覺好舒服。食物就同其他lounge差唔多,不過呢度有免費啤酒飲~
坐國泰最好就係有得睇戲,呢套「跨越8年的新娘」之前夾唔到時間睇(香港上映咗一個星期就落畫)
上年發現依家國泰嘅飛機餐變咗個批,雖然我唔鍾意食飛機餐,但係感覺好似“縮皮”咗好多......
今次選擇飛台北,再轉車去台中。因為台中嘅航班實在太少,好難搵到個靚時間直飛台中。錢就要駛多少少,但係時間就好用好多。
可以搭巴士去高鐵站,不過為咗快D去到,叫車會好D。當日車站冇人排隊,大約15-20分鐘就可以去到。
如果想準時D,可以預早少少check咗時間先,咁就較容易控制。
買飛可以揀劃位或者自由席,不過其實只係相差20台幣。建議買劃位,因為自由席有可能會冇位坐。
去到台中,第一時間食飯先~因為未夠鐘check-in(天氣看似好天,但其實已開始落微雨)
兩個人叫咗一碗麵、一碗麵疙瘩、一碟滷味。大致上可接受,最好食我覺得係滷味。
點知食完就落大雨......等咗一陣細雨少少就衝去酒店
今次住呢間寶島53行館,喺台中車站附近,屬於台中中區。
四個人住一間房,只得一個廁所,唔係太方便。不過樓下就有family mart,補給唔成問題。對面就係宮原眼科,想去食雪糕或者打吓卡的話,住呢度都算方便。
跟住就要趕去玩密室遊戲,一早喺香港book咗15:40,佢話最好十分鐘前到,但係我哋離開酒店已經15:30......
司機仲要去錯咗地方,我哋要去台灣大道二段,但係佢去咗一段。喺落住雨兼遲大到嘅情況下,跑到去都已經4點
由於我哋冇人識台語,所以要問清楚入面有冇台語嘅解謎成份。佢話『米其林尋兇』同『石器時代』兩個都冇台語,香港人都可以玩到。
基本上最少都要有四個人先可以挑戰,但係我又唔想同其他唔識嘅人一齊玩,所以最後決定2人包場!
2人?我哋唔係四個人咩?因為......仲有兩個坐其他機直飛台中...
呢個主題唔算太難(佢哋話唔可以透露內容),但係始終得兩個人,係唔夠時間完成嘅
玩完密室其餘兩個仲未到,唯有坐低飲杯嘢抖吓~
淨係啤酒都有咁多款揀(我影漏咗一版)
呢個係第2round,第1round試咗黑爵客AAA同埋淘氣啤酒花IPA。
最後,仍然等唔到其餘兩位(因為其中一人唔舒服,去咗醫院),咁就剩返兩支公去食飯。
呢間店真係不得了!基本上樣樣嘢都好好食
推介:塩烤七里香(即係雞屎忽)、塩燒豬舌、培根捲干貝(即係帶子)、雞皮仙貝
如果要批評的話,我要批評點解只收現金!雖然每款只係100-200台幣,但係呢餐竟然係全台中最貴嘅一餐
第一天,完
留言列表